La matinata fa la iurnata

Doppu lu sonnu di na nuttata

mi godu lu suli a primu raggiu,

"La matinata fa la iurnata"

dici un proverbiu anticu e saggiu.

E’ primintina la luci chi arriva

tutta la terra s'appara stu raggiu

e comu acqua di la surgiva

inchi la terra nta ogni paraggiu.

La matinata fa la iurnata

quannu passata è ormai la nuttata,

di la minera d'un sonnu scavatu

nesci la gemma d'un gniornu rinatu

Pigghiu lu latti cu li viscotta

e di la vita m'arriva na botta

mancu lu tempu d'arrimuddari

ca ddi viscotta mi fannu vulari

cogghiu l'attrezzi di la iurnata

zappu la terra di la me vita

scavu li surchi pi l'abbrivirata

mettu simenza e subitu spica

Spremu la vita comu un limiuni

quannu lu iornu si metti affacciari

mi sentu forti comu un liuni

e la matina mi mettu a cacciari

E' propria veru quannu si dici

la matinata fa la iurnata

ca senza sforzu di cosi nni fici

dda matinata mi parsi vulata

quannu mi susu nta lu pomeriggiu

mmeci mi sentu ca fussi malatu

tuttu lu cielu mi pari ch'è griggiu

e ogni passu lu sentu furzatu

di Ezio Spataro