"U Vanniaturi" inedita di Giuseppe Guttila

U Vanniaturi 

Ficatu, Quarumi e Masciddaru:
accussì, rirava u tammurinaru
quannu ca trumma avvisava Pupiddu
sia ca c'era u cauru, sia cu friddu

Una pecura si persi a Maragghianu
cu l'asciau a purtassi a Raitanu
e sa truvau vicinu a Cirnuta
pi iddo c'è una bona vivuta

Autri tempi di vanedda e curtigghia
quannu una sciarra si chiuia in famigghia
ora lu tempu è canciatu in peggiu
e la parola è comu un filu di cuteddu

Un si vannia chiù pi avvisari la genti
e sulu si sbraita e un si risorvi nenti
e si avissi a serviri, ti lu dicu in prosa
finisci i parrari e fa tu una cosa



Unn'avi impurtanza si è nica o ranni
basta ca fa, senza cummettiri danni
e si u solitu fissa, sti scassa la pinna
futtitinni, dicci cu fa pi iddu e Ciminna

e si un ci piaci chiddu ca sta facennu
dicci ca si nni issi puru o nfernu
tantu di genti tinta, chi unn'avi chiffari
nta stu Paisi, ci nni sunnu assai

e si pi ogni cosa, unu è criticatu
tantu megghiu, arruspigghiasti un'addummisciutu
e si dopo ca s'arruspigghia, poi l'arraggiuna
vo viriri ca a finisci di rumpiri i cu.......

Giuseppe Guttilla

© Riproduzione riservata